تاجکستان میں وزیراعظم عمران خان کے سامنے تنقیدی نظم پڑھنے والا تاجر مشکل میں پھنس گیا

اسلام آباد (اعتماد نیوزڈیسک) وزیراعظم عمران خان کے سامنے تاجکستان میں تنقیدی نظم پڑھنے والا تاجر مشکل میں پھنس گیا، وفاقی حکومت نے پاکستانی تاجر کے اشعار کو ملک کیلئےسبکی کا باعث قرار دے دیا، فیڈریشن آف پاکستان چیمبرز آف کامرس سے وضاحت طلب ۔

 

 

میڈیا رپورٹس کے مطابق وفاقی وزارت تجارت نے ڈاکٹر خالد امین شیخ کو تاجکستان بھیجنے پر فیڈریشن آف پاکستان چیمبرز آف کامرس اینڈ انڈسٹری  سے وضاحت مانگ لی۔وزارت تجارت کی جانب سے فیڈریشن آف پاکستان چیمبرز کو مراسلہ لکھا گیا ہے جس میں اشعار پڑھنے والے ڈاکٹر خالد امین شیخ کے رویے پر ناپسندیدگی کا اظہار کرتے ہوئے کہا گیا ہے کہ ڈاکٹر خالد پاک تاجک بزنس کونسل اجلاس کے دوران ملک کی سبکی کا باعث بنے ہیں۔

 

 

وزارت تجارت نے سوال کیا ہے کہ بتایا جائےکہ ڈاکٹر خالد کو پاک تاجک بزنس کونسل کے اجلاس کے لیے کس نے منتخب کیا،ڈاکٹر خالد کو اجلاس کے لیے منتخب کرنے کے پیچھے کیا ایجنڈا ہے ؟ وضاحت کی جائے۔ مراسلے میں کہا گیا ہے کہ ڈاکٹر خالد نے اجلاس میں نجی یونیورسٹی کے جھنڈے بھی میز پر رکھے ہوئے تھے ۔

 

 

 

دوسری جانب اس حوالے سے صدر ایف پی سی سی آئی ناصر حیات مگوں کا کہنا ہے کہ دو روز قبل ہی منسٹری آف کامرس کامراسلہ موصول ہوا ہے،مراسلے کا جواب آئندہ ہفتے میں دے دیں گے، شاعری کرنے والے خالد امین شیخ باقاعدہ طور پر ہمارے ممبر ہیں اور ٹیکسٹائل کے کاروبار سے وابستہ ہیں۔ ناصر حیات مگوں کا کہنا ہے کہ خالد امین 20 سال سے چیمبر آف کامرس کے رکن ہیں، انہوں نے تقریب میں جو کہا وہ اپنی ذاتی حیثیت میں کہا۔