سرکاری ٹی وی پر شعیب اختر سے بدتمیزی میزبان ڈاکٹر نعمان کا بیان بھی سامنے آ گیا

اسلام آباد/ لاہور (اعتماد نیوز ڈیسک)پی ٹی وی سپورٹس پر لائیو شو کے دوران غیر ملکی سپر سٹارز کے سامنے شعیب اختر کو شو چھوڑ کر جانے کا کہنے والے میزبان ڈاکٹر نعمان کا بیان بھی سامنے آ گیا ہے۔تفصیلات کے مطابق ڈاکٹر نعمان نے ٹوئٹر پر جاری اپنے بیان میں کہا کہ میں حیران ہوں کہ کیسے کوئی شعیب اختر کو صرف ایک سٹار کے طور پر یاد کر سکتا ہے۔

 

 

وہ تو بیسٹ آف دی بیسٹ ہیں اور ہمیشہ رہیں گے، شعیب اختر ملک کے لیے جو اعزازات لائے ان سے کوئی بھی انکار نہیں کر سکتا۔ ڈاکٹر نعمان نے اپنی ٹوئٹ میں مزید لکھا کہ ایک طرف کی کہانی ہمیشہ اپنی طرف متوجہ کرتی ہے، ہم طویل عرصے سے دوست ہیں، میں ہمیشہ ان کے بہتر مستقبل کے لیے دعا گو ہوں۔ یاد رہے کہ گزشتہ روز سرکاری ٹی وی پر لائیو شو کے دوران پروگرام کے میزبان ڈاکٹر نعمان نیاز نے سر ویون رچرڈز اور ڈیوڈ گاور سمیت دیگر مہمانوں کے سامنے شعیب اختر سے شو چھوڑ کر جانے کا کہا تھا۔

 

 

شعیب اختر نے معاملے کو رفع دفع کرنے کی کوشش کی لیکن جب بات نہ بنی تو شعیب اختر ناصرف شو چھوڑ کر چلے گئے بلکہ انہوں نے پی ٹی وی سے بھی استعفیٰ دیدیا۔

 

 

دوسری طرف شعیب اختر کے چرچے پاکستان کے بھارت سے میچ جیتنے کے بعد ہو رہے تھے کیونکہ شعیب اختر نے بھارتی کھلاڑی کو کہا تھا کہ پاکستان میچ جیت کے دیکھائے گا اور پاکستان نے بہت اچھے انداز میں میچ جیت لیا۔