پی ڈی ایم کا حکومت کے لیے تحفہ تیار۔۔ مولانا فضل الرحمان نے اہم اعلان کر دیا۔۔

لاہور: (اعتماد نیوز) پاکستان ڈیموکریٹک موومنٹ (پی ڈی ایم) کے سربراہ مولانا فضل الرحمان نے اعلان کیا ہے کہ اپوزیشن اتحاد نے متفقہ طور پر پی ٹی آئی کی موجودہ حکومت کے خلاف تحریک عدم اعتماد پیش کرنے کا فیصلہ کیا ہے۔

پی ڈی ایم اجلاس کے بعد پریس کانفرنس کرتے ہوئے مولانا فضل الرحمان نے کہا کہ پاکستان ڈیموکریٹک موومنٹ حکومت کی اتحادی جماعتوں سے رابطہ کرے گی تاکہ انہیں بھی اپنے ساتھ شامل کیا جاسکے۔ حکومتی اتحادیوں کی شمولیت سے تحریک انصاف حکومت کے خلاف تحریک عدم اعتماد کے دوران قومی اسمبلی میں اکثریت حاصل کی جاسکے گی۔

انہوں نے کہا کہ ہم سب سے پہلے اپنا ہوم ورک کریں گے، اس لیے ہم اس اقدام کے لیے مقررہ وقت کے بارے میں بات نہیں کر سکتے۔ پی ڈی ایم نے اس مرحلے پر تحریک عدم اعتماد کا اعلان کیا ہے کیونکہ ہمارا ایسا کرنے کا پختہ ارادہ ہے۔

مولانا فضل الرحمان کا کہنا تھا کہ امپائر کہتے ہی اسے ہیں جو نیوٹرل ہو، پہلے کھیل کسی اور کے ہاتھ میں تھا،ا ب ان کے ہاتھ سے نکل چکا، 23 مارچ کو لانگ مارچ کا فيصلہ برقرار ہے۔

سربراہ پاکستان ڈیموکریٹک موومنٹ نے واضح کیا کہ انفرادی طور پر کسی سے رابطہ نہیں کریں گے، پی ٹی آئی کے اراکین سے رابطے نہیں کئے جائیں گے، کسی کو لالچ نہیں دیں گے۔