کراچی میں ٹریفک چالان کا فائدہ حکومت کی بجائے کوئی اور لینے لگا، اہم حقائق سامنے آگئے، حکومتی مشینری حرکت میں۔۔۔

کراچی میں نجی کمپنی کو فائدہ دینے کے لیے ٹریفک پولیس اہلکاروں کی طرف سے ٹریفک قوانین کی ہر خلاف ورزی کا الگ الگ چالان عوام سے لیا جاتا ہے۔

نجی کمپنی چالان کی سرکاری رقم سے 20 روپے فی چالان بطور کمیشن وصول کرتی ہے اور اس سلسلے میں موصول دستاویز کے مطابق یہ سلسلہ کئی سال سے جاری ہے اور تکنیکی طور پر ٹریفک پولیس جرمانے جمع کرنے والی نجی کمپنی کے لیے سہولت کار بنی ہوئی ہے، اس صورت حال سے شہری کئی سالوں سے لٹتے آ رہے ہیں۔ اور شہری اس صورت حال سے پریشان ہیں

پولیس ذرائع کے مطابق اگر کسی شہری نے موٹر سائیکل پر نمبر پلیٹ نہیں لگائی ہوئی یا ہیلمٹ نہیں پہنا یا پھراس نے ون وے کی بھی خلاف ورزی کی ہے تو اسے ایک چالان کے بجائے ٹریفک پولیس اہلکار کی جانب سے تین الگ الگ چالان دیے جاتے ہیں جس کا مقصد واضح طور پر چالان کی رقم وصول کرنے والی نجی کمپنی کو فائدہ پہنچانا ہے۔

پولیس ذرائع کے مطابق اگر ٹریفک قوانین کی تین خلاف ورزیاں ایک ہی چالان میں عائد کر دی جائیں تو نجی کمپنی کو شہری سے صرف بیس روپے ملیں گے،اورتین الگ الگ چالان کرنے کی صورت میں کمپنی کو ایک شہری سے بیس روپے کے بجائے ساٹھ روپے کا فائدہ ہوتا ہے۔

ذرائع کے مطابق کراچی میں روزانہ دس ہزار سے زائد چالان کیے جاتے ہیں اور ٹریفک پولیس کے اعداد و شمار کے مطابق سال 2020 میں کراچی ٹریفک پولیس کی جانب سے بتیس لاکھ پچاس ہزار سے زائد چالان کیے گئےجن پر نجی کمپنی نے چوہتر کروڑ چالیس لاکھ پندرہ ہزار سے زائد جرمانہ وصول کیا جب کہ کمپنی نے جرمانے پر چھ کروڑ پچاس لاکھ سے زائد کا کمیشن الگ حاصل کیا۔