ٹک ٹاک پر پاکستانیوں کی ویڈیوز ڈیلیٹ ہونے لگیں، ٹک ٹاک نے اہم تفصیلات جاری کر دیں۔۔

اینٹرٹینمنٹ (اعتماد ٹی وی) ٹک ٹاک پر ویڈیوز کے حوالے سے سخت چیک رکھا جارہا ہے۔ کمپنی کی پالیسیوں کی خلاف ورزی پر ہر ماہ لاکھوں ویڈیوز ڈیلیٹ کی جارہی ہیں۔

 

 

’ٹک ٹاک‘ کی رپورٹ کے مطابق پاکستان سے 73.9 فیصد مواد ہراسانگی کو فروغ دینے اور 72.4 فیصد مواد نفرت کو بڑھاوا دینے جیسی وجوہات کی بنا پر ڈیلیٹ کیا گیا ہے۔

 

 

اگر بات کی جائے گزشتہ برس جولائی سے ستمبر تک کی تو اس عرصے کے دوران ٹک ٹاک نے کمیونٹی گائیڈ لائنز کی خلاف ورزیوں پر 60 لاکھ سے زائد پاکستانی ویڈیوز اپنے پلیٹ فارم سے ختم کی ہیں۔

 

 

’ٹک ٹاک‘کی تازہ ترین ’کمیونٹی گائیڈلائنز انفورسمنٹ رپورٹ‘ کے مطابق دنیا بھر میں سب سے زیادہ جن ممالک کی ویڈیوز ڈیلیٹ کی گئی ہیں ان میں پاکستان کا چوتھا نمبر ہے۔

 

 

جولائی سے ستمبر 2021 کے دوران ’ٹک ٹاک‘ کی طرف سے دنیا بھر میں 9 کروڑ ویڈیوز ڈیلیٹ کی گئیں۔ ڈیلیٹ کی گئی 95 فیصد ویڈیوز ایسی ہیں جنہیں پلیٹ فارم پر اپلوڈ کیے جانے کے بعد بغیر کسی صارف کی شکایت کے حذف کیا گیا، 88 فیصد ویڈیوز کو کسی کے دیکھنے سے پہلے ڈیلیٹ کیا گیا جبکہ 93 فیصد ویڈیوز کو اپلوڈ ہونے کے 24 گھنٹے کے اندر حذف کیا گیا۔

 

 

اس کے علاوہ ’ٹک ٹاک‘ کا کہنا ہے کہ ویڈیو شیئرنگ پلیٹ فارم کو مزید بہتر بنانے کے لیے اس سال کمپنی واشنگٹن، ڈبلن اور سنگاپور میں اپنے مانٹرنگ اور تحقیقاتی سینٹرز قائم کرے گی۔

 

 

واضح رہے پاکستان کی مرکزی حکومت متعدد بار ٹک ٹاک کو مبینہ طور پر ’نازیبا اور غیر اخلاقی‘ مواد کو اپنے پلیٹ فارم پر جگہ دینے کی وجہ سے بلاک کر چکا ہے۔ ٹک ٹاک پر لگنے والی پابندی کو آخری بار اکتوبر 2021 میں ہٹایا گیا تھا۔