سوئس بینکوں سے ڈیٹا لیک۔ دنیا بھر کے صحافیوں نے ڈیٹا حاصل کر لیا۔ فواد چوہدری نے ڈیٹا کے متعلق اہم تفصیلات بتا دیں

اسلام آباد (اعتماد ٹی وی) کسی بھی ملک کی ترقی کی راہ میں کرپشن اور بدعنوانی کو سب سے بڑی رکاوٹ قرار دیا جاتا ہے۔ بدقسمتی سے پاکستان میں بھی کرپشن اور منی لانڈرنگ سمیت بدعنوانی کے بڑے بڑے کیسز آئے روز رپورٹ ہوتے ہیں جو وطن عزیز کو آگے بڑھنے سے نہ صرف روک رہے ہیں بلکہ عالمی سطح پر بدنامی کا باعث بھی بنتے ہیں۔

 

وزیر اطلاعات و نشریات فواد چوہدری نے کرپشن اور منی لانڈرنگ کو پاکستان کو درپیش بڑے مسائل میں سے قرار دیا ہے۔ ٹوئٹر پیغام میں فواد چوہدری نے لکھا کہ پاناما اور پنڈورا پیپرز کے بعد سوئس بینک سے بڑے پیمانے پر لیک سامنے آیا ہے۔
فواد چوہدری نے لکھا کہ وزیراعظم عمران خان اس معاملے پر مسلسل آواز اٹھا رہے ہیں اور امیر ممالک سے غریب ممالک کا استحصال بند کرنے کا مطالبہ کر رہے ہیں۔

 

 

فواد چوہدری نے اپوزیشن جماعتوں کے اختلافات کا حوالہ دیتے ہوئے کہا کہ منی لانڈرنگ کرنے والے تمام سیاست دان اب تحریک انصاف کی حکومت کے خلاف اکٹھے ہورہے ہیں تاہم یہ ماضی کی طرح اب بھی شکست ہی کا منہ دیکھیں گے۔

 

گزشتہ روز دنیا کے مشہور ترین بینکوں میں سے ایک کریڈٹ سوئس سے ڈیٹا لیک ہوا ہے جس میں منی لانڈرنگ، بدعنوانی اور دیگر سنگین جرائم میں ملوث کلائنٹس کی چھپی ہوئی دولت کو بے نقاب کیا گیا ہے۔

 

 

آرگنائزڈ کرائم اینڈ کرپشن رپورٹنگ پروجیکٹ کے مطابق مختلف ممالک کے صحافیوں نے لیک ہونے والے ریکارڈ حاصل کیے ہیں جن میں 18,000 سے زائد ایسے غیر ملکی صارفین کے اکاؤنٹس کی نشاندہی کی گئی ہے جنہوں نے اپنی رقم کریڈٹ سوئس میں جمع کرائی تھی۔