وفاقی وزیر منصوبہ بندی و ترقی اسد عمر نے ملک میں کرفیو لگانے کے حوالے سے اہم بیان دے دیا۔

وفاقی وزیراسد عمر کا کہنا ہے کہ مردم شماری کا قومی شناختی کارڈ سے تعلق نہیں، یہ شناختی کارڈ کی بنیاد پر نہیں ہو گی۔ ایک تقریب سے خطاب کرتے وقت وفاقی وزیر منصوبہ بندی و ترقی اسد عمر نے کہا کہ مردم شماری کیلئے کرفیو لگانے کا کوئی ارادہ نہیں ،کرفیو اس صورت میں لگایا جاتا ہے جب مردم شماری ایک ہی دن میں ہو۔ اسد عمر نے کہا کہ نیشنل کو آرڈیننس سینٹر صوبوں کے ساتھ منسلک ہوگا ،کوشش کریں کہ ادارہ شماریات تمام معلومات میڈیا سے شیئر کرے۔

 

 

وفاقی وزیرنے کہا کہ یہ بنیادی ستون ہے جس پر مستقبل کا دارومدار ہے ،ملک میں جتنی اعتماد کی فضاء بحال ہوتی جا رہی ہے اس سے اچھے نتائج سامنے آنے کا امکان ہے، شماریات پر تمام صوبوں سے ماہرین مانگے گئے تھے۔

 

 

وفاقی وزیر نے کہاکہ اسمبلی اور پارلیمنٹ کوہمیں اعتماد میں لینا ہوگا ،مردم شماری میں فوج کا کام سیکیورٹی کا ہو گا اور اس کے لیے دس ارب کا ہارڈ ویئر اور سافٹ ویئر لیا جا رہا ہے ،رواں سال جاری اخراجات کے لیے5 ارب رکھے گئے ہیں۔انہوں نے کہاکہ مئی جون میں پائلٹ ٹیسٹ ہو گا ،پاکستان میں رہ کر کوئی وسائل استعمال کرے تو اسکا شمار ہو گا ۔ جو فرد روزگار کے سلسلے میں جا کر رہ رہا ہے وہاں پر اسکا شمار ہو گا ۔

 

 

اسد عمر نے کہا کہ اچھی فیصلہ سازی کے لئے اچھے ڈیٹا کی ضرورت ہوتی ہے ،ملک میں آئندہ کی منصوبہ بندی کے لئے مردم شماری ضروری ہوتی ہے،جدید ٹیکنالوجی کے باوجود مردم شماری کبھی 10، کبھی 15 سال بعد ہوتی ہے۔لہذا اتنے اہم کام کے لئے ضروری ہے کہ جدید ٹیکنالوجی استعمال کریں، این سی او سی میں جدید ٹیکنالوجی کے باعث فوری جلد انفارمیشن مل جاتی تھی۔اسد عمر نے کہا کہ اپوزیشن اتنی تاریخیں دے چکی اتنی تو سول کورٹ نہیں دیتی، بات زرداری اور نواز شریف سے نکلی اور مریم، بلاول تک پہنچ چکی، اب تیسری نسل بھی تیار ہو چکی ہے۔