پاکستانی عوام پر مہنگائی کا ایک اور طوفان آنے کو تیار۔ حکومت نے اہم اعلان کر دیا

اسلام آباد (اعتماد ٹی وی) مہنگائی کے کوڑے عوام پر دھڑا دھڑ برس رہے ہیں۔ ضروریات زندگی کی اشیا اتنی مہنگی کی جارہی ہیں کہ عام پاکستانی کا دو وقت پیٹ بھرنا بھی محال ہورہا ہے۔

 

 

پٹرولیم مصنوعات اور مہنگی بجلی و گیس کے بعد اب گندم مزید مہنگی کرنے کی تیاری کی جارہی ہے جس کے بعد آٹے کی قیمتیں آسمانوں تک پہنچنے کا اندیشہ ہے۔

 

 

پنجاب کابینہ نے گندم کی فی من قیمت 2200 روپے مقرر کرنے کی سفارش وفاق کو ارسال کی ہے، تاہم وفاقی وزرا نے تحفظات کا اظہار کرتے ہوئے قیمت پر اختلاف کیا ہے۔

 

 

وفاقی وزرا کا مؤقف ہے کہ گندم کی امدادی قیمت خرید گزشتہ سال 1800 روپے فی من مقرر کی گئی تھی، اور اب یکمشت 400 روپے فی من اضافہ کرنے سے آٹا کی قیمت میں غیر معمولی اضافہ ہوگا۔

 

 

پنجاب اور خیبرپختونخوا میں گندم کی امدادی قیمت خرید کے حوالے سے وفاقی وزرا کے اختلاف سامنے آئے ہیں۔ پنجاب کابینہ کی جانب سے گندم کی فی من قیمت 2200 روپے مقرر کرنے کی سفارش وفاق کو ارسال کی گئی ہے، جس پر اہم ترین وفاقی وزراء کی جانب سے تحفظات کا اظہار کیا گیا ہے۔

 

 

پنجاب کابینہ کی جانب سے ارسال کی گئی گندم اسپورٹ پرائس کی سمری اقتصادی رابطہ کمیٹی میں پیش کی جائے گی، وزیراعظم عمران خان اقتصادی رابطہ کمیٹی کی سفارشات پر وفاقی کابینہ میں غور کریں گے، اور وزیراعظم مشاورت کے بعد آئندہ چند روز میں حتمی فیصلہ کریں گے۔