“آئندہ چوبیس گھنٹو ں میں اپوزیشن کو ہر گھنٹے بعد ایک سرپرائز دیں گے” شیخ رشید نے نیا کٹا کھول دیا

لاہور ( اعتماد ٹی وی ) تحریک عدم اعتماد کے بعد حکومت بھی کھل کر کھیلنے کے لئے میدان میں آگئی ہے۔ بلاول بھٹو زرداری کے 24 گھنٹے اور مولانا فضل الرحمان کے 48 گھنٹے تو کچھ اثر نہ دکھا سکے پر وزیر داخلہ شیخ رشید نے میدان میں آتے ہی اعلان کر دیا کہ حکومت مخالف اتحادیوں کو اب 24 گھنٹو ں میں ہر ایک گھنٹے کے بعد سرپرائز ملے گا۔

 

 

وزیر داخلہ شیخ رشید نے کہا کہ اس تحریک میں کامیابی کا سہرا وزیر اعظم کے سر باندھا جائے گا اور مخالفت کرنے والوں کو ناکامی کا سامنا کرنا ہو گا۔ انھوں نے کہا کہ پاکستان تحریک انصاف کے کارکنان نے پہلے بھی کہا تھا کہ وہ اپنے وزیراعظم کے ساتھ کھڑے ہیں اور آئندہ بھی ساتھ ہی کھڑے رہیں گے۔

 

 

 

نجی ٹی وی سے گفتگو کے دوران وزیر داخلہ نے کہا کہ جیسا پہلے بھی کہتا آیا ہوں اتحادی موجود حکومت کے ساتھ ہیں اب اس بات کا اندازہ اپوزیشن کو بھی بخوبی ہو جائے گا۔

 

 

 

متحدہ قومی موومنٹ تو پہلے ہی تحریک انصاف کا ساتھ دے رہی ہے اور ایم کیو ایم کے اراکین سمجھدار و باشعور افراد ہیں۔ ملک کی سلامتی و ترقی کے لئے وہ حکومت کے ساتھ رہنے کو ترجیح دے رہے ہیں۔

 

 

 

وزیر داخلہ نے کہا کہ ایسا ہی آگے بھی ہوگا ہر گھنٹے بعد ایک اتحادی حکومت کی حمایت کا اعلان کرے گا۔ ایک روز قبل شیخ رشید کے بیان کے بعد مسلم لیگ ق حکومت کے اراکین سے نالاں تھی لیکن شیخ رشید نے اس کشیدگی کو کم کر دیا اور مزید اس پر مہر مسلم لیگ ق کے رہنما اور قومی اسمبلی کے اسپیکر چوہدری پرویز الہٰی نے لگا دی کہ مسلم لیگ ق موجود حکومت کی حمایت میں کھڑی ہے ۔

 

 

 

چوہدری پرویز الہٰی نے کہا کہ جمہوری نظام میں اسمبلیوں کو مدت مکمل کرنی چاہیے ہم بھی وزیر اعظم کے ساتھ کھڑے ہیں کیونکہ وہ سچے اور کھرے انسان ہیں اور ا ن کی نیت پر مجھے کوئی شک نہیں۔ میں نہ تحریک عدم اعتماد کی حمایت کر رہا ہوں اور نہ ہی موجودہ وزارت سے استعفیٰ دے رہا ہوں۔