پہاڑوں کی شادیاں کروانے کا رواج پاکستان میں بھی رائج ہیں، کیا آپ جانتے ہیں کونسا پہاڑ نر اور کونسا مادہ ہوتا ہے، جانئے ان کی شادی کی منفرد رسومات

پاکستان میں گلئیشرز کی شادی کی قدیم رسم موجود ہے۔

 

گلگت بلتستان (اعتماد ٹی وی) گلیشیئرز سے متعلقہ سب کو صرف یہی معلوم ہوتا ہے کہ یہ ایک برف کا پہاڑ ہے لیکن کیا آپ نے کبھی سنا ہے کہ ان میں بھی نر اور مادہ ہوتے ہیں جن کی باقاعدہ شادی سے ایک مصنوعی گلیشیئر وجود میں آتا ہے ۔ اس بات کو سائنس بھی تسلیم کر تی ہے۔

 

گلیشیئر کی شادی کو پایہ تکمیل تک پہنچانے کے لئے ایک جگہ کا انتخاب کیا جاتا ہے اس کے متعلق مکمل سوچ بچار کرکے یہ فیصلہ کیا جاتا ہے ۔

 

گلگت کے رہائشی امان اللہ نے بتایا کہ ایسی جگہ جہاں سورج کی روشنی پڑتی ہے تو برف فوراً پگھلتی ہے اس لئے ضروری ہے اس جگہ سایہ رہے اس لئے ہم وہاں ٹاٹ لے جاتے ہیں تاکہ برف یک دم نہ پگھل جائے اور اس کے ساتھ وہ جگہ نمی والی بھی ہو دھوپ کا وہاں آنا نہ ہو۔

 

محکمہ موسمیات کے سابق ڈی جی اور گلاشیالوجسٹ ڈاکٹر غلام رسول کے مطابق جو برف والے پہاڑ ہیں ان کو مادہ گلیشیئر اور مٹی ، ڈیبری والے پہاڑ ہیں ان کو نر گلیشیئر کہا جاتا ہے ۔ ماد ہ گلیشیئر کی آئس کلیر ہوتی ہے تو وہ زیادہ جلد پگھل جاتی ہے۔

 

 

ڈاکٹر غلام رسول کے مطابق چھ ہزار میٹر کی بلندی پر پورا سال ٹمپریچر منفی ہوتا ہے اس لئے وہاں برف رہتی ہے اس جگہ برف کے ملاپ سے گلیشیئر بننے کےاور جلد بڑھنے کے امکانات زیادہ ہوتے ہیں۔

 

پانی کی کمی پورا کرنے کے لئے یہ گلیشیئر کی شادی یا پھر گرافٹنگ کی جاتی ہے جو کہ صرف پاکستان میں ہی نہیں بلکہ نیپال و بھارت میں بھی ہوتی ہے۔ اس شادی کے لئے بھی خاص شخص کا انتخاب کیا جاتا ہے جو کہ نہ صرف نیک ہو بلکہ کنوارہ بھی ہو۔

 

امان اللہ نے بتایا کہ خاص بندے کا انتخاب ایک قدرتی عمل ہے اس کے لئے صاف و ایماندار لوگوں کی ضرورت ہوتی ہے۔ یہ مخصوص آدمی نر اور مادہ کے حصے جمع کر کے ان کو یکجا کر دیتا ہے وہاں کے مقامی افراد کو نر اور مادہ کے پہاڑوں کی پہچان ہوتی ہے۔

 

اس شادی میں ایک خاص پتھر کو اہمیت دی جاتی ہے جس کو گارنٹ اسٹون بولتے ہیں ۔ ریسرچرز کے مطابق اس میں نمی رہنے سے گلیشیئر زیادہ ہو جاتا ہے۔ موسمیاتی تبدیلیوں کی وجہ سے اس بات کی ضرورت ہے مصنوعی گلیشیئر زیاد ہ تعداد میں لگا کر ماحول کی نازک صورتحال کو سنبھالا جائے۔