سڑک پر ڈالروں کی بارش، ویڈیو سوشل میڈیا پر وائرل، اصل کہانی سامنے آگئی

سوشل میڈیا پر ایک ویڈیو وائرل ہوئی جس میں لوگوں کو گاڑیوں کے اوپر کھڑے دیکھا جا سکتا ہے اور آسمان سے ڈالرز کی بارش ہو رہی ہے جسے پکڑنے کے لیے لوگ بھاگ رہے ہیں۔

 

گاڑیوں اور تقریب کے ایک حصے کے آس پاس جمع ہونے والے افراد کو فوٹیج میں ڈالرز پکڑتے دیکھا جاسکتا ہے۔

 

معاملے کی تحقیقات کے بعد پتا چلا کہ یہ ایک شادی کی تقریب ہے جو گوجرانوالہ کے علاقے ڈی سی کالونی میں ہوئی جہاں ایک صنعتکار نے اپنے بیٹے کی بارات کے دوران ڈالروں کی بارش کر دی۔

 

یہ بات سامنے آئی کہ جیسے ہی دولہا اپنے دوسرے رشتہ داروں کے ساتھ شادی ہال میں پہنچا اس کے والد نے دوست اور رشتہ دار مہمانوں پر ڈالرز اور پاکستانی کرنسی کے نوٹوں کی بارش کر دی۔

 

مقامی افراد اور شادی میں شریک افراد کو کرنسی نوٹ جمع کرتے ہوئے ویڈیو میں دیکھا جاسکتا ہے۔

 

یہ پہلا موقع نہیں ہے جب ملک میں شادی کی اسراف انگیز تقاریب کا انعقاد کیا جارہا ہے اور اسی طرح کی ایک اور حرکت میں ، پنجاب کے ضلع ڈیرہ غازی خان میں ایک ’بارات‘ میں نوٹوں کے ساتھ ساتھ موبائل فون کی بارش دیکھی گئی۔

 

لوگوں کی ایک بڑی تعداد ، جلوس کے ان حصوں اور راہگیروں سمیت ، گاڑی کے آس پاس جمع ہوگئی اور نوٹ اور موبائل فون اٹھانے کے لیے اس کے قریب جانے کے لئے کوششیں کرنے لگے۔