وزیر اعظم عمران خان نے پیر کو آئل اینڈ گیس ریگولیٹری اتھارٹی (اوگرا) کی سمری مسترد کردی جس میں پٹرولیم مصنوعات کی قیمتوں میں 16 فروری سے اضافے کی سفارش کی گئی تھی۔
وزیر اعظم نے ایک بیان میں کہا کہ وفاقی حکومت عوام کو ریلیف کی فراہمی کے لئے رواں ماہ کے باقی دنوں تک ایندھن کی قیمتوں میں اضافہ نہیں کرے گی۔
آئل اینڈ گیس ریگولیٹری اتھارٹی (اوگرا) نے اپنی سمری میں 16 فروری سے پیٹرول کی قیمت میں 14.7 روپے فی لیٹر اضافے کی تجویز پیش کی تھی۔
اوگرا نے ہائی سپیڈ ڈیزل پر 13.61 روپے فی لیٹر اور لائٹ ڈیزل پر 7.43 روپے اضافے کی سفارش کی تھی۔
یکم فروری کو وفاقی حکومت نے وزیر اعظم عمران خان کی منظوری کے بعد پٹرول، ڈیزل اور دیگر مصنوعات کی قیمتوں میں اضافے کا اعلان کردیا تھا۔
وزیر اعظم نے پیٹرول پر 2.70 روپے فی لیٹر اور ڈیزل پر 2.88 روپے فی لیٹر اضافے کی منظوری دی تھی۔ مٹی کے تیل کی قیمت میں 3.54 روپے فی لیٹر تک اضافہ کیا گیا جبکہ لائٹ ڈیزل کی قیمت میں 3 روپے فی لیٹر تک اضافہ کردیا گیا۔
