دبئ ( اعتماد نیوز ڈیسک ) بنگلہ دیشی کے مشہور وکٹ کیپر اور بلے باز مشفیق الرحیم اپنے پاکستانی ساتھی آصف علی کے بیٹ کا معائنہ کرتے پکڑے گئے، شائقین نے ان کی ویڈیو بنا کر سوشل میڈیا پر ڈال دی۔ لوگوں کے مزے مزے کے کمنٹ۔
تفصیلات کے مطابق، آئی سی سی کرکٹ اکیڈمی دبئی میں پاکستانی کرکٹ ٹیم جب پریکٹس کے دوران باجماعت نماز کی ادائیگی کر رہی تھی تو بنگلہ دیشی مشہور کرکٹر مشفیق الرحیم پاکستانی کرکٹ ٹیم کے مڈل آڈر کھلاڑی آصف علی کا بیٹ چیک کرنے پہنچ گئے اور وہ کافی دیر تک بیٹ کو الٹ پلٹ کر دیکھتے رہے ۔
ایک اور ویڈیو میں دیکھا جاسکتا ہے کہ جب آصف علی اپنا سامان لے کر واپس جارہے تھے تو ایک صحافی نے آصف علی سے کہا کہ اب تو آپ کے بیٹ کی ڈیمانڈ ہے۔ انہوں نے پوچھا کہ یہ سیالکوٹ سے بنوایا ہے یا باہر سے منگوایا ہے؟
جس پر آصف علی نے چلتے چلتے جواب دیا کہ میں نے خود بنایا ہے ۔ یاد رہے کہ پاکستانی بلے باز آصف علی نے ورلڈ کپ ٹی 20 میں اپنی جارحانہ بیٹنگ سے حریف ٹیموں کو حیران اور پریشان کر کے رکھ دیا ہے ۔
