کراچی سمیت سندھ بھر میں سی این جی اسٹیشنز دوبارہ فعال ہوگئے۔ واضح رہے سوئی سدرن گیس کمپنی کی جانب سے یکم دسمبر سے ڈھائی ماہ کیلئے سندھ میں تمام سی این جی اسٹیشنز کو گیس کی فراہمی معطل کردی گئی تھی تاکہ گھریلو صارفین کو گیس کی بلاتعطل فراہمی یقینی بنائی جاسکے۔
گیس کی طویل بندش کیخلاف آل پاکستان سی این جی ایسوسی ایشن نے 21 دسمبر کو کراچی میں دھرنے کا اعلان کیا تھا۔ آل پاکستان سی این جی ایسوسی ایشن کے ممبر سمیر نجمل کا کہنا تھا کہ خیبر پختونخوا میں روزانہ 9 گھنٹے کیلئے گیس فراہم کی جاتی ہے، اس کے برعکس صوبہ سندھ جہاں تقریبا 64 فیصد گیس پیدا ہوتی ہے، وہاں گیس اسٹیشنز کو گیس کی فراہمی کئی روز سے معطل ہے۔
سی این جی ایسوسی ایشن حکام کا موقف ہے کہ اسٹیشنز کو کچھ دیر کیلئے گیس رکشوں، وین اور ایمبولنسز کو فراہم کرنے کی اجازت دی جائے تاکہ وہ افراد جن کی گاڑیوں میں پیٹرول ٹینک نہیں ہے، اُن کا کاروبار چل سکے۔ صارفین کا کہنا تھا کہ انہوں نے تو آئے روز سی این جی کی بندش سے تنگ آ کر سی این جی کٹ ہی گاڑی سے نکلوادی تھی۔
