لاہور (اعتماد ٹی وی) شوبز انڈسٹری میں اداکاروں کی شادی کے حوالے سے کوئی نہ کوئی خبر گردش کرتی ہی رہتی ہے۔ کبھی یہ خبریں حقیقت کی شکل اختیار کر لیتی ہیں اور کبھی محض ایک افواہ۔ ایسا ہی عفان وحید کے ساتھ ہوا، ان کی جھوٹی شادی کی خبر پھیلی تو ایک خاتون ان کے گھر آ کر سلامی دے گئیں۔
اداکار انٹرویو ز میں اپنے ساتھ ہوئے دلچسپ واقعات بتاتے ہیں حال ہی میں دئیے ایک انٹرویو میں عفان وحید نے بتایا کہ جس اداکارہ کے ساتھ بھی کام کروں ان کے ساتھ افئیرز اور شادی کی خبریں پھیل جاتی ہیں۔
پہلے حرا مانی کے ساتھ میرا ڈرامہ نجی چینل پر نشر کیا جارہا تھا تو حرا مانی سے میرا افئیر ہے ایسا مشہو ر ہوگیا ، اس کے بعد درفشاں اور اب رمشا کے ساتھ بھی میرا نام جوڑا جا رہا ہے۔
عفان وحید نے کہا کہ میں دوبارہ شادی کے لئے ذہنی طور پر تیار نہیں ہوں 2016 میں میری شادی ہوئی اور کچھ عرصہ بعد ہی طلاق ہو گئی اس کے بعد سے میں نے شادی سے متعلق سوچا ہی نہیں ۔ ہاں یوٹیوب و دیگر سوشل میڈیا پر میری شادی سے متعلقہ خبریں پھیلتی رہتی ہیں۔
ایسا ہی رمشا سے میری شادی کی خبر کا میری ایک رشتے دار خاتون کو علم ہوا، تو وہ گھر آ کر ناراضگی کا اظہار کر نے لگی اور پھر سلامی دے کر گئی۔
میری والدہ کو بھی علم نہیں تھا انھوں نے مجھ سے تصدیق کی اور پھر ان خاتون کو سلامی کی رقم5000 روپے واپس کی اور حقیقت بھی ان کے گوش گزار کی کہ ایسا کچھ نہیں ہے میرے بیٹے کی جب شادی ہو گی تو سب کو خود مطلع کروں گی۔
