کپتان شریف خاندان کے ہر پلان کیلئے تیار ہے
منڈی بہا الدین میں جلسہ عام سے خطاب کرتے ہوئے وزیراعظم عمران خان نے کہا کہ نواز شریف کے کبھی ایک بیماری تو کبھی دوسری بیماری میں مبتلا ہونے کی باتیں سامنے آئیں، نواز شریف کی پلیٹ لیٹس کی بات ہوتی ہے تو میں سمجھتا ہوں کہ شاید نواز شریف آج گئے یا کل، لیکن ایسا نہ ہوا۔
وزیراعظم عمران خان نے کہا ہے کہ نواز شریف کو بیرون ملک بھیجنا ہماری بڑی غلطی تھی۔ وزیراعظم عمران خان نےمسلم لیگ ن کے صدر شہباز شریف کو تنقید کا نشانہ بناتے ہوئے کہا کہ چھوٹے میاں کا دل بہت کمزور ہے، شہباز شریف کو پتہ ہے کہ ان کا کیس چلا تو انہوں نے نہیں بچنا، اگر شہباز شریف بے قصور ہیں تو وہ کیوں عدالت سے بھاگ رہے ہیں، آج عدالتیں آزاد ہیں۔
مسلم لیگ ن کی نائب صدر کو آڑے ہاتھوں لیتے ہوئے عمران خان کا کہنا تھا مریم صاحبہ کہتی ہیں کہ میرے پاس ٹیپیں ہیں، کبھی آپ نے سنا ہے کہ سیاستدان ٹیپ کے ذریعے کسی کو بلیک میل کریں۔
ان کا کہنا تھا کہ یہ لوگ چاہتے ہیں کہ جس طرح پرویز مشرف نے انہیں این آر او دیا تھا میں بھی دے دوں لیکن جب تک زندہ ہوں کبھی انہیں این آر او نہیں ملے گا، قوم کا پیسہ واپس کرنے تک ان ڈاکوؤں کے پیچھے جاؤں گا۔آپ کو ناصرف شکست ہو گی بلکہ آپ سب جیل بھی جائیں گے۔
