جعلی خبروں اور نفرت انگیز مواد کی بڑھتی ہوئی لہر کو روکنے کے لیے حکومت کا اہم اقدام۔ وفاقی حکومت نے ایک آرڈیننس کے ذریعے پریوینشن آف الیکٹرانک کرائمز ایکٹ (PECA) میں ترمیم کرنے کا فیصلہ کیا ہے۔ وفاقی کابینہ نے الیکٹرانک کرائمز ایکٹ میں ترامیم کی منظوری دے دی۔
جعلی خبریں پھیلانے اور نفرت انگیز تقاریر کرنے والے فرد کی قید میں پانچ سال تک اضافے کے علاوہ دس لاکھ روپے تک کا بھاری جرمانہ عائد کرنے کی سفارش کی گئی ہے۔ یہ ایکٹ قومی اداروں کے خلاف نفرت انگیز تقاریر اور جعلی خبریں پھیلانے والوں کے خلاف کارروائی کرنے میں مدد فراہم کرے گا۔
ترمیم شدہ قانون کے تحت، خلاف ورزی کرنے والوں کے ناقابل ضمانت وارنٹ جاری کیے جائیں گے اور 10 لاکھ روپے تک جرمانہ کیا جائے گا۔ فیک نیوز آرڈیننس سوشل میڈیا پلیٹ فارمز پر بھی نافذ کیا جائے گا۔ شہریوں کو جعلی خبروں کے خلاف شکایت درج کرانے کی اجازت ہوگی، مزید برآں متعلقہ عدالت میں الیکٹرانک کرائمز کا ٹرائل 6 ماہ میں مکمل کیا جائے گا۔
الیکٹرونک جرائم کا ٹرائل چھ ماہ میں مکمل نہ کرنے پر ماتحت عدالت ہائی کورٹ کے جج کو جوابدہ ہوگی۔ وفاقی وزیر اطلاعات فواد چوہدری نے گزشتہ روز کہا تھا کہ مجوزہ بل سوشل میڈیا پر بدنامی کو قابل سزا جرم بنا دے گا۔
