کراچی (اعتماد ٹی وی) صوبہ سندھ میں اقلیتی برادری کی عبادت گاہوں کی حفاظت کے لیے پولیس کا خصوصی یونٹ قائم کیا جارہا ہے جو 24 گھنٹے عبادت گاہوں کی سیکیورٹی کے فرائض انجام دے گا۔
سندھ پولیس کے سینئر اہلکار نے بتایا ہے کہ متعلقہ حکام کی جانب سے منظوری ملنے کے بعد نئے یونٹ کے لیے نئی بھرتی کا عمل شروع ہو چکا ہے۔ نئی فورس کے لیے منظور شدہ اہلکاروں کی تعداد تقریباً 5 ہزار ہے اور پہلے مرحلے میں کراچی رینج سے تقریباً 2 ہزار 800 اہلکاروں کو بھرتی کیا جا رہا ہے۔
نئی فورس سے متعلق سینئر اہلکار کا کہنا تھا کہ یہ صوبے بھر میں گرجا گھروں، مندروں اور گردواروں کی سیکیورٹی کی ذمہ دار ہوگی جبکہ اس کے آپریشن اور فرائض کا تفصیلی طریقہ کار مزید ڈیزائن کیا جارہا ہے، لیکن بنیادی طور پر یہ یونٹ اقلیتی برادریوں کی عبادت گاہوں کی حفاظت کے لیے ذمہ دار ہوگا۔
پولیس کے نئے یونٹ کا سربراہ کوئی ایسا افسر ہوگا جو ایس ایس پی رینک سے نیچے نہ ہو جبکہ اس وقت کانسٹیبل سے انسپکٹر تک کی پوسٹوں پر نئی بھرتیاں کی جا رہی ہیں۔ نئی بھرتیوں کے لیے درخواستیں طلب کی گئی تھیں اور مختلف کیٹیگریز کی 2800 پوسٹوں پر ہزاروں نوجوانوں نے درخواستیں دیں۔
سینئر اہلکار نے بتایا کہ بھرتی کے اس عمل میں ایک یا 2 ماہ لگیں گے۔ امید ہے کہ یہ فورس اگلے 3 سے 4 مہینوں میں فعال ہوجائے گی۔
