نیویارک (اعتماد ٹی وی) پاکستان میں حکومتی اور ریاستی اداروں پر تنقید کرنے کی سزا پانچ سال دینے کا ایکٹ نافذ کر دیا گیا ہے۔
برطانیہ سے قانون کی ڈگری حاصل کرنے والے وزیر قانون نے اس قانون کی افادیت اور ضرورت کی جو دلیل پیش کی ہے اُن سے درخواست ہے کہ وہ اس ظالمانہ اور اکیسویں صدی کے تقاضوں کی توہین کرنے والے قانون کے مندرجات کے بارے میں جمہوری برطانیہ کے اُسی تعلیمی ادارہ کے ماہرین قانون اساتذہ سے ہی رائے معلوم کر لیں تو حقیقت سامنے آ جائے گی۔
پاکستان کی تاریخ میں پہلے بھی ایسی ہی پابندیوں کے قوانین اور مارشل لاء ریگولیشنز جاری کئے گئے اور بالاآخر یہ قوانین اپنے منفی اور سنگین اَثرات مرتب کرنے کے بعد ختم بھی ہو گئے۔
خود موجودہ عمران حکومت کے بعض ترجمان تو صرف شخصی کردارکشی کی مہارت اور تجربہ رکھتے ہیں۔ کیا وزیر قانون ایسے ترجمانوں کو بے روزگار کرنے کا ارادہ رکھتے ہیں؟
خود وزیراعظم عمران خان کا اقتدار میں آنے سے قبل دھرنا اور اس کے بعد بھی اس سلسلے میں ریکارڈ سب کے سامنے ہے۔ حکومت کے جاری کردہ ’’پیکا‘‘ قانون پاکستان کی داخلی سیاست اور حالات پر کیا اثرات مرتب کرئے گے
اس بارے میں وطن عزیز کے صحافتی اداروں اور صحافیوں کی تنظیموں نے جو مؤقف اختیار کیا ہے وہ بالکل دُرست اور حقائق پر مبنی ہے لیکن انتقام اور اقتدار کے جنون میں نافذ کردہ اس قانون کے عالمی سطح پر پاکستان کیلئے جو اثرات اور خطرات درپیش ہوں گے اُن پر بھی نظر ڈالنا ضروری ہے۔
