لاہور (اعتماد ٹی وی) تحریک انصاف حکومت کی مدت پوری ہونے میں سوا سال کا عرصہ باقی ہے۔ اسی تناظر میں ملک بھر میں مختلف سیاسی جماعتوں کی جانب سے غیر اعلانیہ انتخابی مہم شروع کی جا چکی ہے۔ مختلف جماعتیں سیاسی جلسوں میں مرکز اور صوبوں میں اگلی حکومتیں بنانے کے دعوے کررہی ہیں۔
پیپلزپارٹی وسطی پنجاب کے صدر راجہ پرویز اشرف نے کہا ہے کہ مخالفین کو خبر دیدو اگلی حکومت پیپلز پارٹی کی ہے۔
پرویز اشرف نے شاہ عالم چوک پر جلسے سے خطاب کرتے ہوئے کہا ہے کہ لاہور جاگتا ہے تو پنجاب جاگتا ہے۔ آصف زرداری نے ساری جوانی جیل میں گزار دی مگر جھکے نہیں، ان کا سیاسی وارث 6 مارچ کو ناصر باغ میں آ رہا ہے، وقت دور نہیں، یقین ہے کہ لاہور والوں کے آگے کوئی نہیں ٹھہر سکتا۔
پرویز اشرف نے کہا کہ آو ایک نئی تاریخ رقم کریں، مہنگائی اور غربت کے ماروں کیساتھ کھڑے ہو جائیں، محالفین کو خبر دیدو اگلی حکومت پیپلز پارٹی کی ہے۔
راجہ پرویز اشرف نے کہا کہ پیپلز پارٹی اور قیادت کی طرف سے نئے شامل ہونیوالوں کو خوش آمدید کہتے ہیں۔
واضح رہے کہ بلاول بھٹو زرداری کل کراچی سے اسلام آباد لانگ مارچ کا آغاز کررہے ہیں۔ بلاول بھٹو زرداری کا کہنا ہے کہ وہ یہ عوامی مارچ مہنگائی، بے روزگاری کے ستائے عوام کو حقوق دلانے اور تحریک انصاف کی نااہل حکومت سے نجات دلانے کے لئے کرنے جارہے ہیں۔
