اسلام آباد (اعتماد ٹی وی) ق لیگ کی حمایت کے ساتھ اگر تحریک عدم اعتماد کامیاب ہو گئی تو اس کے بعد کا منظر نامہ پی ٹی آئی کی بجائے اُن لوگوں کیلئے تھوڑا پیچیدہ ہو جائے گا جو عمران خان کیخلاف ایک دوسرے کے ساتھ دے رہے ہیں۔
تحریک عدم اعتماد کامیاب ہونے کے باوجود بھی مسلم لیگ نون، مسلم لیگ ق، پیپلز پارٹی اور مولانا فضل الرحمان کے آمنے سامنے آنے کا خطرہ، اندر کی بات سامنے آگئی
(ن) لیگ چاہتی ہے کہ جتنا جلد ممکن ہو سکے نئے انتخابات کرائے جائیں، پیپلز پارٹی اور ق لیگ موجودہ اسمبلیوں کی مدت مکمل ہونے میں زیادہ دلچسپی رکھتی ہیں جبکہ فضل الرحمان تو اپنے بیٹے کو وزیراعظم بنانے کی خواہش رکھتے ہیں چاہے ان کے عہدے کی مدت کتنی ہی کم کیوں نہ ہو۔
عمران خان حکومت قومی اسمبلی میں کبھی بھی عددی لحاظ سے اطمینان بخش پوزیشن میں نہیں رہی لیکن اپوزیشن میں سے چاہے کوئی بھی وزیراعظم بن جائے، نئی بننے والی حکومت ایسے اتحادی پارٹنرز کے ساتھ کمزور ہوگی کیونکہ ان لوگوں کے مفادات ایک دوسرے سے متصادم ہیں۔ ق لیگ کیلئے موجودہ صورتحال ایک سنہرا موقع ہے جس میں وہ پرویز الٰہی کیلئے پنجاب کے وزیراعلیٰ کا عہدہ چاہتی ہے۔
