حضرت خواجہ معین الدین چشتیؒ جنہیں غریب نواز کے نام سے یاد کیا جاتا ہے۔ حضرت خواجہ معین الدین چشتیؒ پیر کے روز 14 رجب 536 ہجری کو خراستان و سیستان کے قصبہ خنجر میں پیدا ہوئے۔ آپؒ نجیب الطریفین یعنی جدی حسنی و حسینی ہیں۔ آپ ؒ کا شجرہ نسب خلیفہ چہارم اور داماد رسولؐ امیر المومنین حضرت علی سے ملتا ہے۔ چودہ برس کی عمر میں آپؒ کی والدہ اور پندرہ برس کی عمر میں آپؒ کے والد دنیا سے رحلت فرما گئے۔
مجذوبِ وقت حضرت ابراہیم قندوضیؒ کے ایک لقمے نے آپ کے دل کی دنیا بدل دی، حضرت خواجہ معین الدین چشتیؒ اجمیری نے مقتدائے زمانہ ہستیوں سے علم دین حاصل کیا۔ جن میں علم قرآن، علم حدیث، علم تفسیر، علم فکر، علم منطق اور علم فلسفہ شامل ہیں۔
ان علوم کے لئے انہوں نے اپنے آبائی شہر کو چھوڑ کر سمر قند کا رُخ کیا۔ وہاں آپؒ نے حفظ قرآن سے شروعات کی اس کے بعد کاملِ مرشد کی تلاش میں آپ عجم کی طرف گئے جہاں آپؒ کونشا پور کے قصبے ہارون میں حضرت خواجہ عثمان ہارونیؒ سے ملے، اور اُن کے دست حق پر بیعت کی۔ آپؒ کے پیر ومرشد حضرت خواجہ عثمان ہارونیؒ آپ سے بہت محبت رکھتے تھے انہوں نے آپ ؒ کو امیر کے تبرک سے نوازا۔
مکہ میں مناسک حج کی ادائیگی کے دوران آپؒ کے پیر ومرشد حضرت خواجہ عثمان ہارونیؒ آپ کا ہاتھ پکڑ کر آپ کو میزاب رحمت کے نیچے لے گئے اور ہاتھ پھیلا کر دعا کی کہ اے اللہ میرے معین الدین حسنؒ کو اپنی بارگاہ میں قبول فرما۔ اسی وقت غیب سے آواز آتی ہے کہ معین الدین ہمارا دوست ہے ہم نے اسے قبول کیا۔ اور انہیں عزت و عظمت عطا کی۔
شہنشاہ بغداد حضور غوث اعظم الدستگیر حضرت شیخ عبدالقادر جیلانی نے اپنے عہد مبارک میں اعلان فرمایا کہ میرا قدم تمام ولیوں کی گردن پر ہے تو اسوقت حضرت خواجہ معین الدین چشتیؒ اجمیری خراسائی کی پہاڑیوں میں عبادت میں مصروف تھے تو انہوں نے گردن پر خم کر کے جواب دیا کہ آپ کا قدم میری سر آنکھوں پر ہے تو حضرت شیخ عبدالقادر جیلانی نے پیش گوئی کی عنقریب اللہ تعالیٰ معین الدین چیشی ؒ اجمیری کو ہند کی ولایت عطا فرمائیں گے۔اور پھر آپ کو بارگاہ رسالتؐ کا نائب بنا کر ہند میں بھیجا گیا۔جہاں آپؒ کو داتا صاحب سے فیض حاصل کرنے کا موقع ملا۔
