کابل(این این آئی)کابل ائیرپورٹ پر امریکی افواج اور ان کے اتحادیوں کے انخلا کے دوران رہ جانے والے تربیت یافتہ کتوں کو ائیرپورٹ پر ہی ایک عارضی ٹریننگ سنٹر میں نیا گھر اور نئے مالک مل گئے ۔
کابل ائیرپورٹ پر رہ جانے والے کتوں کو نیا گھر مل گیا
میڈیارپورٹس کے مطابق ائیرپورٹ کی سیکیورٹی کی ذمہ دار کمپنی کے ملازمین نے ان پنجروں میں بند کتوں کی دیکھ بھال کرنے کا فیصلہ کیا ہے۔ یہ کتے کابل ائیرپورٹ کے امریکی فوج کے زیر استعمال حصے میں پائے گئے تھیمگر امریکیوں سمیت کسی نے ان کی ذمہ داری قبول نہیں کی ہے۔سیکیورٹی کمپنی کے ایک ملازم ھواد عزیزی کے مطابق جیسے ہی انہیں اطلاع موصول ہوئی کہ امریکی فوجی روانہ ہوگئے ہیں وہ ان کتوں کو تلاش کرنے ائیرپورٹ پر آگئے۔انہیں ائیرپورٹ میں 30 کتے پنجروں میں بند ملے جن میں سے آدھے امریکی فوج کے زیر کنٹرول علاقیمیں سے پائے گئے تھے اور باقی ماندہ افغان پولیس کے زیر انتظام عمارت میں بند تھے۔
ان تمام کتوں کی اب سکیورٹی کمپنی کے ملازمین، عزیز اور ان کے ساتھی دیکھ بھال کر رہے ہیں اور انہیں دو کنٹینروں سے بنائے گئے عارضی دفتر میں رکھا گیا ہے۔امریکی صدر جو بائیڈن نے 30 اگست کو افغانستان سے تمام امریکی فورسز کے انخلا کا اعلان کیا تھا جس کے بعد افراتفری کے عالم میں امریکی اور ان کے اتحادی افواج اور افغانستان میں موجود امریکی معاون افغان باشندے کابل ائیرپورٹ سے انخلا کو پورا کیا گیا۔
